Blog Banners

歡迎到訪本網誌!  |  Welcome to visit this blog! 現正上映:《加勒比海盜:惡靈啟航》  |  Now Showing: 'Pirates of the Caribbean: Dead Men Tell No Tales' 《星球大戰:最後絕地武士》  |  'Star Wars: The Last Jedi' 巴黎迪士尼樂園 25週年慶典  |  Disneyland Paris 25th Anniversary Celebration

2013年7月28日 星期日

魔法‧音樂‧奇幻 (Magic‧Music‧Mystery) Part 1!

由「預演日」果篇網誌開始已經同大家分享過本blog 將會較詳細地向大家介紹「迷離莊園」呢個全球獨有嘅主題園區。多謝各位讀者嘅細心等待,以下呢四個部份將會同大家探索莊園裡嘅魔法、音樂以及奇幻!

「迪士尼幻想工程師」們致力將想像變為現實,而呢期園區正正就喺由三百多名WDI 嘅努力下為大家帶嚟一次奇幻之旅!喺「與迷離莊園幕後大師對話」活動當中,「華特迪士尼幻想工程」創意部資深副總裁 Joe Lanzisero (林思朗先生)提到「幻想工程師」喺創作呢個遊樂設施時不但要俾賓客睇到當中嘅特別效果,而「更上一層樓」嘅目標就係希望透過種種嘅創新技術嚟令到賓客真 係相信有魔法嘅存在,所以「音樂星塵」最終以一個較為新穎嘅方式呈現喺大家嘅眼前!


歡迎大家嚟到「迷離莊園」(Mystic Point)!

當大家踏入莊園時,各位會去到1908年嘅時空。而亨利爵士(Henry Mystic) 亦都喺同年正式開放咗佢位於大宅下嘅私人博物館俾各位冒險家、探險家以及收藏家參觀,而您正正喺亨利爵士獲邀到此參觀嘅其中一位特選貴賓!

「迷離莊園」座落喺巴布亞新幾內亞(Papua New Guinea) 嘅熱帶雨林之中,除咗可以到訪大宅下嘅私人博物館外,大家亦都可以走訪擺放咗多件具3D立體錯視效果嘅藝術品之「奇幻庭園」(Garden of Wonders)、安放咗多件剛剛到步嘅收藏品之「迷離莊園車站」(Mystic Point Freight Depot)、充滿各國特色嘅「迷離珍藏店」(The Archive Shop) 以及一眾冒險家同探險家聚首一堂嘅場所「大冒險家餐廳」(The Explorer's Club Restaurant) !而莊園入面擺放咗7,000多件嘅道具展品,而展品會分佈喺各個設施裡面。


要介紹「迷離莊園」裡面嘅標誌性建築物必定就係「迷離大宅」(Mystic Manor)!


大宅具有19世紀維多利亞式嘅風格,當中亦都包含咗莫斯科西班牙北非等嘅設計風格,顯然地令「迷離大宅」成為獨一無二且富有各國特色嘅建築物。

【本則內容之更新日期:5 / 3 / 2016】整座大宅充滿住各國嘅建築風格,當中包括下圖所示嘅俄羅斯(Russia)、泰國(Thailand)、北非摩爾(North Moore)以及 西班牙(Spain)建築設計。


而喺大宅嘅塊坊上亦都可以見到猴子嘅蹤影!


由於亨利爵士只係開放咗大宅底層嘅博物館,故此各位賓客不能參觀大宅中嘅私人區域。


喺2011年嘅「擴建預覽中心」裡面,園方向賓客展示咗「迷離大宅」嘅模型。而從模型中可發現最初喺由一條樓梯再喺中段分成兩條樓梯嚟通往大宅。但宜家就係先分成兩條樓梯再喺中段變成一條樓梯嚟通往大宅!


亨利爵士喺莊園入面興建咗一個車站以方便佢運送從世界各地所搜集得到嘅收藏品到莊園入面並且準備向各位來賓展示。


而車站入面嘅三個大型收藏品亦都成為咗一個拍照景點!


海神波賽冬(Poseidon) 頭部銅像

瑪雅文明石碑

古埃及象形文字石碑


車站設有無障礙設施,藉此可以俾行動不便嘅賓客參觀呢個車站。


車站上仲擺放咗唔少工具以及最新到步嘅收藏品!


當「香港迪士尼樂園鐵路」經過莊園嘅時候,火車會變成來往雨林嘅一架用作運送收藏品嘅火車。車站旁邊分別有路軌同埋河流,亨利爵士主要會使用鐵路以及船運兩種方式將收藏品運送至莊園。


雖然車站上寫明只供貨運用而不用作載客,但睇返火車路與車站嘅距離其實係可以加返一個月台以供載客之用。


「迷離莊園車站」(Mystic Point Freight Depot) 除咗係方便亨利爵士運送世界各地嘅珍藏品之外,車站仲有另一個用途。亨利爵士嘅姪孫會喺車站上邀請一班喺旅途中所認識到嘅文化大使參加「迷離莊園世界民族 大使見面會」 (Mystic Point Ambassador Announcement and Meet & Greet)!


同大家介紹一下各位民族大使先!由左至右嘅(姪孫旁開始) 分別係來自墨西哥印度北美洲埃及以及保加利亞嘅世界民族大使!


當車站上嘅留聲機一響起,見面會正式開始!而細心嘅讀者都有機會聽到留聲機所播放嘅其中一段音樂喺遊樂設施「迷離大宅」中嘅主旋律!


同大家介紹一下各位民族大使先!由左至右嘅(姪孫旁開始) 分別係來自墨西哥印度北美洲埃及以及保加利亞嘅世界民族大使!


姪孫M&G 時間!


同場加映,「迷離莊園車站」嘅Concept Art!


大家亦都會發現車站前設置咗一段路軌伸至大宅嘅裝卸區,而呢段路軌正正係為咗方便亨利爵士將最新搜羅嘅珍藏品運入大宅裡面。



講咗咁耐,終於都講到亨利爵士嘅私人博物館啦!


而喺博物館入口嘅塊坊上亦都可以見到猴子嘅蹤影!


由車站伸至大宅嘅裝卸區嘅果段路軌會喺呢度整理剛剛到步嘅珍藏品!


博物館入口外設有戶外排隊區,大家可以喺當中欣賞到幾尊雕像。


準備入去啦!  


而喺進入室內排隊區前,大家可以喺裝卸區 (Loading Dock) 欣賞多幾眼剛剛到步嘅珍藏品,當中有大衛像嘅頭像、古代天文儀器等等。


歡迎大家嚟到亨利爵士嘅私人博物館!


當大家步入室內排隊區時,第一眼會見到一張舊相。相中正正係亨利爵士喺1896年1月1日 (元旦日) 為私人博物館舉行嘅開幕典禮!


之後大家會見到由亨利爵士所寫嘅歡迎致詞!


而喺歡迎致詞嘅底部會見到「迷離大宅」嘅標誌,標誌印有大宅“Mystic Manor” 嘅簡稱“MM” !而位於大宅標誌嘅左右兩旁亦都會見到由英文字母“S”、“E”以及“A” 所組成嘅標誌。究竟呢個標誌代表啲乜嘢㗎呢?稍後大家就會知道個答案!


其後,大家會見到一副畫像,畫中正正顯示咗大宅中嘅最新珍藏品「巴厘猴紋鑲寶石音樂盒」(Balinese Music Box) !


亨利爵士喺一次峇里島嘅旅程中發現咗呢個神秘音樂盒,當地嘅巴厘部落族長同埋原居民喺當時係懷着如釋重負嘅心情好樂意地將呢個神秘音樂盒送贈俾亨利爵士,而喺「預演日」期間,園方喺同一位置擺放咗以下呢幅畫像俾大家知道呢個神秘音樂盒嘅來源。但自從開幕以後,呢幅畫像就換成上一張圖片中所見只印有音樂盒嘅畫像!究竟果幅畫像去咗邊度呢?呢一點又為莊園添加咗一個迷離之處! 


接着,大家會見到三幅畫像,當中介紹咗亨利爵士以及與「阿拔」相認嘅過程。


亨利爵士係一位大名鼎鼎嘅探險家,佢年少時已經離開咗位於英國嘅家鄉四出探險以探尋各種不同嘅藝術品、遠古遺產以及超自然嘅珍品。作為一位探險家,佢一定 會認識到唔少志同道合嘅朋友。而佢地就一齊創立咗「探險家•冒險家學會」嚟與更多同道中人探索世界以及分享寰宇珍藏!喺以下嘅畫像中,亨利爵士抱住嘅果隻 馬騮仔就係「阿拔」(Albert) 啦!


亨利爵士係點樣識到「阿拔」㗎呢?一切源自有一次喺巴布亞新幾內亞嘅旅程中,亨利爵士見到一隻小猴子被一個巨型蜘蛛網纏住,於是佢就去拯救呢隻小猴子啦!而亨利爵士同「阿拔」就係因此而認識對方,並且成為最佳嘅拍檔。


而呢幅畫像正正係同大家介紹跟隨亨利爵士並作記錄遊歷嘅畫家查爾登塔波里(Charlton J. Taboret) 先生!


之後,大家會見到整個莊園嘅模型,而位於模型櫃內嘅牆上亦都掛上咗「迷離大宅」以及「迷離珍藏店」連同「大冒險家餐廳」嘅設計圖則。



然後,呢幅畫像係同大家介紹亨利爵士親自發明嘅全自動座駕「迷離莊園電磁廂車」(Mystic Magneto-Electric Carriage) 並喺1900年參展巴黎「世界博覽會」時榮獲第一名之殊榮!


接着,大家會見到幾幅人畫像。「迪士尼幻想工程師」喺設計嘅同時亦都會向樂園中嘅經典遊樂設施以及重要人物致敬,而以下呢幾幅人畫像正正係一個好好嘅例子。


巴特里斯達博士 Dr. J. L. Baterista (向「華特迪士尼幻想工程」創意部資深副總裁Joe Lanzisero 致敬!)


Maestro D. Elfman (向為莊園配樂嘅國際級音樂大師Danny Elfman 致敬!)



【本則內容之更新日期:24 / 8 / 2013】而喺今年嘅D23 Expo 入面亦都有唔少與MP 有關嘅新資訊,相關嘅補充資料將會在此同大家去分享。首先,鮑爾希姆教授(Professor R. Blauerhimmel) 就係向「華特迪士尼幻想工程師」Rob't Coltrin 致敬,佢係一名Concept Designer!


【本則內容之更新日期:24 / 8 / 2013】其次,以下呢位成員就係向「迪士尼幻想工程」(香港) 執行創意總監Mark Schirmer 致敬!佢喺圖中嘅角色係 Barnabas T. Bullion,Bullion 係「神奇王國」樂園 (Magic Kingdom Park) 「Big Thunder Mountain Railroad」遊樂設施故事中嘅「Big Thunder Mining Company」創辦人。

【本則內容之更新日期:24 / 8 / 2013】另外,雖然喺今屆D23 Expo 嘅"Mayhem, Mischief, and Monkeys: The Magic of Mystic Manor" 分享會入面並沒有提及以下幾位人物,但從當日所播放嘅影片中可發現呢幾位人物其實同影片中所岀現過嘅「迪士尼幻想工程師」有啲相似。因此,本blog 喺仔細研究後就得出咗以下嘅推論。


【本則內容之更新日期:24 / 8 / 2013】奧森尼爾船長 (Captain M. Oceaneer) 就係向「華特迪士尼幻想工程師」Liana Zorn 致敬,佢係一名Show Programmer!

【本則內容之更新日期:5 / 11 / 2013】其實喺四艘「迪士尼郵輪」("Disney Magic", "Disney Fantasy", "Disney Dream" 以及 "Disney Wonder") 入面均設有"Disney’s Oceaneer Club" 以及 "Disney's Oceaneer Lab" 嘅遊樂設施,而當中嘅"Oceaneer" 一字正正與船長嘅其中一個名字相同。由此可見,奧森尼爾船長(Captain Mary Oceaneer) 原來係向呢個遊樂設施致敬!順帶一提,「幻想工程師」喺為「迪士尼郵輪」航隊(Disney Cruise Line) 中歷史最悠久嘅一艘郵輪 "Disney Magic" 進行翻新嘅時侯亦都延續咗奧森尼爾船長嘅故事。從官網嘅內容中可發現,位於呢郵輪上嘅"Disney's Oceaneer Lab" 正正就係奧森尼爾船長擺放旅程中所得到嘅寶物以及計劃下一次冒險旅程嘅重要地方,而奧森尼爾船長亦邀請船上所有小朋友一齊進行冒險!難怪佢套衫有幾似「迪士尼郵輪」船長果套衫!

【本則內容之更新日期:3 / 8 / 2016】 根據郵輪上嘅背景故事,Oceanear 船長係一位尋寶家,佢有一隻叫做 Salty 嘅鸚鵡,而 Oceanear 船長嘅故事將會延續至於2017年3月喺「Disney’s Typhoon Lagoon」水上樂園開幕嘅全新遊樂設施「Miss Fortune Falls」,賓客將會睇到船長喺「Typhoon Lagoon」擱淺多年後而遣留落嚟嘅寶藏。


【本則內容之更新日期:24 / 8 / 2013】以下呢位成員就係向「華特迪士尼幻想工程師」Ethan Reed 致敬,佢係負責"Audio-Animatronics" 以及其它機械嘅運作!


【本則內容之更新日期:24 / 8 / 2013】以下呢位成員就係向「華特迪士尼幻想工程師」Bob Zalk 致敬,佢係一名Show Producer!


【本則內容之更新日期:24 / 8 / 2013】而畫家查爾登塔波里(Charlton J. Taboret) 先生就係向「華特迪士尼幻想工程師」Fintan Burke 致敬,佢係一名Animation Production Lead!


此處就係同大家簡單地介紹「探險家•冒險家學會」 (Society of Explorers and Adventurers;簡稱S.E.A.) 。"S.E.A." 創立於1538年,而學會係致力搜集、保護以及收藏來自各國嘅文物以將文化傳承俾下一代!


剛才大家都見過一個由英文字母“S”、“E”以及“A” 所組成嘅標誌,而呢個正正係「探險家•冒險家學會」嘅標誌。


呢幅畫像正正就係同大家介紹一眾創會成員!


而喺畫像中,除咗可以見到亨利爵士以及「阿拔」外,大家亦都會見到一位熟悉嘅老朋友 ------ Harrison Hightower III!


Harrison Hightower III係Hightower Hotel嘅主人,而上圖中嘅雕像正正就係來自非洲嘅“Shiriki Utundu”! 而大家可以喺位於「東京迪士尼海洋」(Tokyo Disney SEA) 中嘅「驚魂古塔」(Tower of Terror) 見到更多關於Harrison Hightower III 嘅畫像。


【本則內容之更新日期:24 / 8 / 2013】順帶一提,其實Harrison Hightower III 就係向「迪士尼幻想工程師」Joe Rohde 致敬!



講起「探險家•冒險家學會」,其實位於「東京迪士尼海洋」中嘅Explorer's Landing正正就係學會成員嘅基地!


本blog 在此感謝朋友喺近日抽空去到「東京迪士尼海洋」為本篇網誌拍攝相關嘅照片!Explorer's Landing 中隨處都可發現“S.E.A.” 嘅標誌,一齊去探險囉!


從上面幾張圖片都可以發現到基地嘅徽號入面除咗有“S.E.A.” 嘅標誌外,當中亦包含四幅圖畫。


而果四幅圖畫正正就係代表着學會嘅精神,當中包括:追求 (Romance)、冒險 (Adventure)、創新 (Innovation) 以及 發現(Discovery)!




基地正門及廣場:


作為一個基地就當然有一定嘅裝備啦!


而喺基地入面亦都有個地方可以睇睇3D立體錯視效果嘅藝術品。唔知道「奇幻庭園」嘅靈感係咪來自呢度嘅呢?


有關Explorer's Landing 嘅相片暫時就分享都呢度,有機會的話再同大家分享!



好!我哋返到嚟室內排隊區繼續參觀。


接着,大家會見到幾幅畫像。


亨利爵士與「阿拔」登上維京長船(Viking Longship) 探索「波羅的海」!


喺17世紀未所製作嘅漆器浮雕板畫「俄羅斯之春」(“Russian Spring”),大家一陣會喺「北歐室」入面見到呢件展品。


呢幅畫像記錄咗亨利爵士與「阿拔」獲得佢頂首頂土耳其氈帽嘅一刻,大家睇吓「阿拔」幾咁開心!

【本則內容之更新日期:5 / 3 / 2016】故事係發生喺佢哋喺一次旅程中到訪咗一間服飾店,店內有一款土耳其氈帽吸引着佢哋嘅目光。可是,呢款帽只得一頂。由於店主見到佢哋好鍾意呢款土耳其氈帽,於是店主決定為阿拔特別製作咗一頂同款嘅土耳其氈帽。


呢幅畫像就係記錄咗「阿拔」發現木乃伊嘅一刻!


之後,大家會見到一啲展品。


睇返Concept Art,同上圖嘅最終樣貌相比下的確有唔少嘅分別。


而牆上亦都掛咗一張世界地圖,當中標示咗發現展品嘅地點!


同大家介紹一下以下呢幾件展品先!


埃及頭飾及頸飾 (Egyptian Headpiece & Necklace):


歌德式雙龍耳聖杯 (Gothic Dragon Chalice):


莫卧兒鑲紅寶石匕首 (Mughal Dagger):


法國宮廷彩繪折扇 (French Vanity Fan):


瑪雅三腳壺 及 達布魯古西班牙金幣 (Mayan Jug & Gold Doubloons):


斯內地瑟咸翹金絲托克飾環 (Snettisham Hoard Great Tore):


薩頓胡頭盔 (Sutton Hoo Helmet):


也門布丹純銀頸飾 (Yemeni Boudin Necklace):


接着,呢幅畫像係講述佢吔揾到一尊來自中國嘅「齊天大聖」孫悟空嘅玉雕,大家一陣會喺「中國沙龍室」入面見到呢件展品。


其後,大家又會見到幾幅畫像。


來自喀拉哈里沙漠非洲部落面具(African Tribal Mask)!


來自大溪地嘅鼓手神像(Drummer Idol) 柚木雕像!


而呢幅畫像係講述「阿拔」發現「熔岩神神殿」(The Temple of the Lava God) !



之後,大家會進入一個走廊。走廊四周掛上介紹展品嘅簡介圖,大家可以喺大宅嘅博物館內、「奇幻庭園」、「迷離珍藏店」以及「大冒險家餐廳」內發現所介紹過嘅展品,詳情將於其餘三個部份與大家逐一去分享。



而喺走廊中可發現博物館嘅地圖,但旅程係咪只係咁簡單呢?



準備好進入演講廳未呀?請 按此 前往閱讀Part 2!



參考網站及資源 (References) :

1. “Story behind Mystic Manor: Imagineers get inspired by classic dark rides to create new adventures for Hong Kong Disneyland” (來自 From:“Inside The Magic” by Ricky Brigante)

2. “Harrison Hightower III” (來自 From:The Disney Wiki)

3. 「『迷離莊園』尋寶百科」 (來自 From:香港迪士尼樂園官方 Facebook專頁)

4. 「驚魂古塔 Tower of Terror」 (來自 From:東京迪士尼度假區官方網站)

5. 「要塞探險Fortress Explorations」 (來自 From:東京迪士尼度假區官方網站)

6. 「全球獨一無二的主題園區「迷離莊園」5月17日正式開幕 科技特效及細緻設計打造原創故事 呈獻疑幻疑真的奇幻旅程」 (來自 From:香港迪士尼樂園官方新聞稿)

7. 「全球獨一無二的主題園區「迷離莊園」正式開幕」 (來自 From:香港迪士尼樂園官方新聞稿)

8. Making of Mystic Manor with Imagineers and executives at Hong Kong Disneyland (來自 From:“Inside The Magic” YouTube Channel)

9. Behind The Scenes: Exploring the New Mystic Manor at Hong Kong Disneyland  (來自 From:Disney Parks’ YouTube Channel)

10. Mystic Manor - "Mayhem, Mischief, and Monkeys: The Magic of Mystic Manor"   (來自 From:Scott Hoagland YouTube Channel)

11.  "Disney's Oceaneers Club" (來自 From:Disney Cruise Line 官方網站) 

12. "Disney's Oceaneers Lab" (來自 From:Disney Cruise Line 官方網站)  



Disney, Walt Disney Imagineering, Hong Kong Disneyland Resort

沒有留言 :

張貼留言